U3F1ZWV6ZTE2MzY5NTM1MTAzNzQ3X0ZyZWUxMDMyNzMxODIzMTA5MA==

الاستثمار المثالي في السوق المصري


استثمار الأموال  في مصر

فلوسك أزاي تستثمرها في مصر ، أو بالمعني كيفية إستثمار الأموال في السوق المصري ؟
السوق المصري مختلف تماماً عن الاسواق العربية والاسلامية في مختلف الصناعات والسبب في كده ان مصر جنة الاستثمار فيها كل المجالات وكل الصناعات، إستثمار الأموال : هو توظيف الاموال بطريقة سليمة بهدف زيادتها والابقاء عليها وعلي قيمتها دون الخسارة أو النقصان. التعريف مش معناه الاستثمار انك يبقي معاك مبلغ كبير عشان تستثمر لأ ممكن معناه المحافظة علي رأس المال وحتي لو بسيط وزيادته لو امكن ذلك. مبدئيا فائدة البنوك حالياً بين ١١ الي ١٧ ٪ يعني أي مشروع استثماري لازم العائد منه يكون زي البنك أو ازيد من البنك والا لو المشروع بيعمل أقل من كده لا الأحسن انك تحط فلوسك في البنك.(علي الرغم ان ليا تحفظ كبير علي البنك ومعاملاته تحفظ ديني وايضا معاشي ). المعدل الطبيعي لزيادة راس المال يكون من ٢٠ الي ٢٥ ٪ من رأس المال يعني المليون يكونوا مليون ٢٠٠ او ٢٥٠ الف خلال سنة وهنا السؤال المنطقي ايه إستثمار الأموال أزاي ؟
استثمار

إستثمار الأموال في الذهب

الذهب هنا يكون لكل الفئات الاستثمارية من الموظفين والعمال والمديرين وأصحاب الشركات واصحاب رؤوس الاموال ولكنه يعتبر جزء من عملية الادخار للحفاظ علي قيمة رأس المال الاصلية.السبب في كده ان الذهب زينة المرأة + انه عنصر استثماري لبلاد كتيرة بتعتمد عليه بشكل اساسي في الدخل.

فتقدر ولو بمبلغ بسيط انك تشتري الذهب فلو انت موظف قبضك من ٣٠٠٠ الي ٤٠٠٠ تقدر خلال شهرين تشتري خاتم او دبله بعدد جرامات قليل وممكن تكلفته لا تتعدي ١٥٠٠ ج ومع مرور الشهور هتلاقي عندك جرامات ذهب كتيرة لو تمت عملية تكرار الشراء بصفه دورية كل شهر او شهرين،السبب في تجميد الفلوس وحتي لو بسيطة هي اساس عملية الادخار،هو انك بتدخر وفي نفس الوقت بتستثمر، الادخار ان فلوس اتشالت وايدك مبتتمدش عليها وفي نفس الوقت هل تعتقد انه خلال ٨ شهور من شرائك هل السعر هيفضل ثابت ،هتكسب وحتي لو بسيط بس علي الاقل قدرت تحافظ علي المبلغ البسيط ولو امكن هتلاقيه زاد زيادة من ١٠ الي ١٢ ٪ وأحيانا اكثر طبعا،تقدر انت كراجل تشتري ذهب وتعينه مع الوالده او زوجتك او اهل بيتك ،الذهب عموما سهل البيع ونفس الوقت استثماره سهل فتخيل لو معاك فلوس اكتر واكتر وليكن ١٠٠٠٠ الي ٢٠٠٠٠ واستثمرتهم في ذهب ،عكس ما يبقوا معاك هتلاقيك كل شوية تصرف ١٠٠ في ١٠٠ لحد ما تلاقي قيمتهم نقصت النص وده سلوك بشري انه طالما معاه فلوس قلبه بيجمد في الشراء فتلاقي نفسك بتشتري بزيادة من غير ما تحس، في نقطة انك حابب تسيل الفلوس ومش حابب تجمدهم في دهب ، عشان متصرفش منهم لازم تكون سايبهم في مكان بينك وبينهم مسافة، لا تقل عن ٢٠ كيلو او نص ساعه مواصلات والسبب في كدة ان عقلك هيراجعك طول الطريق او المسافة في عدم صرف الفلوس واحتمال كبير ترجع عن رأيك انما لو في جيبك أو في البيت هيبقوا ساهلين تحت ايديك وهتشتري اللي مش عايزه وترجع تفكر تقول كنت أجلت وهكذا

استثمار المال في العقارات

الناس معتقدة ان مبلغ ٢٠٠ الف مبلغ صعب وكبير وفي الحقيقة هو مبلغ ضئيل جدا بالنسبة لصناعة العقارات نفسها ده يعتبر العربية ١٢٨ في سوق العقارات ،لكن لو معاك ٥٠ الف تقدر انك تستثمرهم في شقة ،والراجع في كده انك تدور اية المناطق اللي فيها كثافه سكانية عالية وطلب شراء عالي وعلي الرغم من كده المعروض كتير فالسعر قليل ،مناطق زي فيصل والهرم - حدائق اكتوبر - جسر السويس - واي منطقة تعتبر شعبية،هتلاقي فيها اسعار مشابهه لكده علي الطوب الاحمر ،وللاسف المحافظات والاقاليم اغلي من القاهرة عموما في العقارات حتي في الايجارات ،ايجار المحل في طلعت حرب التحرير يترواح من ٩٠ الي ١٨٠ الف في الشهر،ايجار عند جماعة المنصورة علي الكورنيش ٢٠٠ الف جنية وانت طالع،مش لازم تشتري في محافظتك او مدينتك لو مش متوفرلك الامكانيات والماليات ،بلاد ربنا واسعه والفرص اكثر واقل ،هل تعتقد انك لازم يبقي معاك ٢٠٠ الف عشان تشتري شقة طوب احمر،للاسف لا مش لازم لو معاك المقدم وليكن ٥٠٠٠٠ تقدر تتفق وتكتب عقد مبدئي وتتفق علي مده اقساط من سنتين الي ٣ سنين وفي احيانا خمس سنين ،هل تعتقد انك سعر الشقة خلال فترة تقسيطك ليها ثمنها مزادش ؟ اكيد زاد النهاردة انت أشتريت شقة وبعد سنتين او ثلاثه بقا ليك كامل الحرية في بيعها،مش لازم تجمع كامل الفلوس عشان تشتري ، اشتغل عشان تقدر تجيب المقدم وربك بيكرم المديون بالمناسبة ،العقارات بتزيد زيادة رهيبة ممكن تزيد نسبه ١٠٠٪ من ثمنها

أسباب زيادة أسعار العقارات

  1. سفلته الشارع والطريق يزيد من ارتفاع العقار او الوحده السكنية
  2. خدمات الكهرباء والماء والغاز وخدمات المواصلات والسوبر ماركت اللي جمب بيتك وقربك من السوق يزيد من ارتفاع قيمة العقار
  3. يا سلام لو ركب مترو جمبك او موقف ميكروباصات علي بعد كيلو او اقل من منزل بيتك
  4. سكن شخصيات ليها ثقل اجتماعي يزيد من قيمة الشقة او الوحده السكنية (ده بجد مش هزار) يعني لو جارك ظابط او مستشار او ما يماثله من الثقل الاجتماعي يزيد من قيمة الوحدة السكنية
  5. الادوار المتوسطة يزيد من زيادة قيمة الوحده السكنية وخصوصا اللي قدامها view حلو
  6. قرب المسجد بيت الله من منزلك او وحدتك السكنية يزيد من قيمتها
  7. لو في باركينج تحت بيتك يزيد من ارتفاع ثمن الوحدة السكنية

استثمار المال في المشاريع الصغيرة والمتوسطة

طيب تفتح مشروع ولا تشتغل وظيفة ثابته ؟ مفيش حاجة اسمها كده ، ده حاجة وده حاجة،مينفعش تعمل الاتنين مع بعض الوظيفة علي فكرة بتبنيك بتبني فكرك وذاتك بتبني طريقة تفكيرك في المشاكل والحلول ،الوظيفة بتعرضك انك تتعامل مع عقليات واساليب مختلفة في الشغل،بتخلي دماغك تفتح بجد ، لو دماغك مفتحه عمرك ما هتقول انا مبحبش اشتغل عند الناس وحد يتحكم فيك ،الحقيقة انت عقلك لسه محدود الفكر مفيش حاجة اسمها بيتحكم فيك انت شايفها كده علي الرغم انك مجربتش وده للاسف الفكر المحدود ،حتي لو بيتحكم فيك بيتحكم في شغلك مش في شخصك ، ولازم تفصل الاتنين ببعض ،انت بيتطلب منك أعمال ومهمات تعملها بس هو ده الشغل ،ضغط الشغل ده اللي المفروض تكسبه من الوظيفة ،لان عمر مشروعك الخاص هينجح الا لما تتعرض لضغط الشغل ده لان المشروع بيسرق وقت الواحد واعصابة وبتنسي نفسك فيه وبتنسي اكلك وشربك وبتشيل همه، موضوع انك تفتح مشروع وتنجحه اصعب بكتير من أنك تشتغل عند الناس

لكن امتي تفتح مشروعك؟ لما تلاقي نفسك اثقلت بالخبرة الكافية والتفكير العقلاني والهادئ ابدء اسس شغلك الخاص بجانب شغلك ليه ؟عشان مشروعك في البداية هيكون متعب ومهلك وممكن لاقدر الله متستحملش وتخسر فلوسك وترجع تاني من الصفر ابدء سيب الوظيفة لما مشروعك ينور ويبدا يقف علي رجله ويكون بدء يجيب من ٧٠٪ من مرتبك اللي بتاخده في الوظيفة هنا بدات لو اديته مجهودك كله هيبقي يعوضك عن الوظيفة أعمل الاتنين مع بعض

مشاريع استثمار الاموال

من الخطأ ان تضع البيض في سله واحدة، يعني لو معاك مليون جنية تشتري بيهم شقة واحده ده خطأ - الافضل ليك انك تشتري ٥ شقق ب ٢٠٠ الف جنية ،السبب في كده راجع لعده عوامل منها ان العقار عالي القيمة بطئ البيع مش كل الناس معاها المبلغ اللي تقدر تشتري بيه واحده بمليون جنية وشوية ،لكن كتير من الناس يقدر يشتري شقق ب ٢٥٠ وخلافه ،من الخطأ ان تضع فلوسك كلها في مشروع واحد،هات صديق ليك بيفهم في حاجة انتو الاتنين بتحبوها وبتفهموا فيها وتكون بتحل مشكلة مجتمعية وباذن الله فكرتكم هتنجح ،الناس بتشتري عشان خايفة،خايف الفلوس تضيع فبشتري اصول ، خايف ميستمتعش بحياته بيحجز في فنادق ويسافر بره وياكل في مطاعم مختلفة ،خايف من تضييع وقته بيروح يشتري عربية، اساس الناس لو فكرت فيه هتلاقي الاساس فيه الخوف ،انت وانت بتستثمر بتبيع للناس الاطمئنان. طيب انت راجل معاك ١٠٠الف وهتفتح مشروع تعمل ايه ؟ من الخطأ انك تفتح مثلا كافية ب ١٠٠ الف لا قدر الله حصل شئ هتخسر ال ١٠٠ كلهم ،انما لو ٥٠ خسرتهم فمعاك علي الاقل ٥٠ وده يرجع لادارة المخاطر،تقدر انك تستثمر ٥٠ في كافية والباقي مثلا قي محل ملابس ،ممكن شريك وممكن استثمار في كافيه قائم اصلا وتعرض علي صاحبه انك تشاركه وهكذا في كل مشروع هتدخله،مش شرط تأسس وده مهم طبعا متنساش مكان المشروع لانه عامل كبير في نجاحه واسال نفسك ليه البراندات الكبيرة بتأجر في اشهر الشوراع واغلي الاماكن ،عشان الناس كتيرة في المناطق دي ،بالظبط ممكن تفتح كافيه جمب مصلحه حكومية فبدل ما يستنوا في الشمس ينتظروا عندك وطبعا محدش بينتظر الا وهيطلب مشروب ،تقدر انك تفتح مكتبه ملاصقه لمكتب ضرائب أو قوي عامله او مكاتب التأمين أو بالقرب من البنوك والمحاكم ،كل ده وسيلة لأنك قريب من زباينك واللي ممكن يحتاجوك ،طيب لو انت موظف حكومة تقدر تستثمر ؟ ، للاسف قانون العمل الخاص بالهيئات والوزارات بيمنع علي الموظف اي نشاط تجاري ربحي وده تقدر تتلاشاه بأنك تكون شريك في كذا مشروع أو أن اخوك او مراتك تكون العقود باسمها وهكذا استثمار

استثمار المال عن طريق استغلال الازمات والحروب والاوبئة

هل تعتقد ان مفيش ناس استغلت الازمة الموجودة حاليا بشراء كميات كبيرة من الكمامات وباعتها في السوق السوداء باضعاف الثمن وهذة متاجرة بحقوق الناس والله لا يرضي عن ذلك ولكنه نوع من الاستثمار ،لكن الغرض من النقطة دي وهي أن الناس بتقدم علي الاستثمار بالشراء في الاماكن الخطره أو المقاربة لاندلاع مظاهرات او مشاكل والسبب في كده ان الناس الموجودة في تلك المناطق بتبقي عايزة تسيب وتمشي من المكان بسبب الاعمال المذكورة فوق من الدوشة والزحمة وعدم الامان ،زي ميدان التحرير اثناء مظاهرات الثورة عموما بتقل فيه قيمة الايجارات والبيع والسبب في كده ان في مشاكل كبيرة بتحصل في الاماكن دي فاصحابها بيبيعوا ويسيبوا اعرف حد اشتري ٦ بيوت في ميدان التحرير باسعار عاليه لكن وقتها كانت غير القيمة العادلة للثمن الحقيقي للعقار نفسه اثناء عامي ٢٠١٢ و ٢٠١٣ وحاليا بعد هدوء المكان وعودته الي طبيعته يتربح ٥٠ % من قيمة البيوت شهريا من ايجارات وخلافة
تعليقات
ليست هناك تعليقات
إرسال تعليق

إرسال تعليق

رائع

الاسمبريد إلكترونيرسالة